صناعه سينما ام صناعه يأس .بقلم \عمرو السعودي

**عمرو السعودي**

صناعه سينما ام صناعه يأس
بقلم \عمرو السعودي

لست ناقدا سينمائيا ولست متخصصا في التحليل الفني للاعمال السينمائيه ولكني اسعي لمشاهده فيلم مصري كل اسبوع بالرغم من قله الوقت بسبب العمل .
فتح يوسف شاهين في اخر اعماله مشاركه مع خالد يوسف الباب علي مدرسه جديده في السينما المصريه . اسميها انا مدرسه (هي كده وخلاص ) وكانت اول انتاجها فيلم (هي فوضي )
بمعني ان اللغه السينمائيه الغير مباشره والتي كانت تحمل بعض من الغموض في اعمال يوسف شاهين اتخذت لغه اخري تعتمد علي المباشره وتعريه طبقه العشوائيات في مصر ومحاوله استغلال بعض من نماذج هذه الطبقه(المسطول – الفتوه – النصاب .. الخ
في لعب دور البطوله في العمل السينمائي ومحاوله جذب طبقات المجتمع التي كانت تبتعد عن اعمال كاعمال يوسف شاهين او خالد يوسف

انا لااحاول انكار العنف او البلطجه او الفهلوه او المخدرات في احيائنا الفقيره كل ما احاول ان الفت النظر اليه هو قله الابتكار والتنويع في الانتاج السينمائي الذي يحمل فكر ومحاوله نهج نفس المعادله الاخراجيه لمخرج اخر علي سبيل الامان فقط .
في خلال هذا الشهر شاهدت ثلاث افلام جديده
دكان شحاته-الفرح-ابراهيم الابيض
وكما قلت انا لست ناقدا . ولكني متذوق . الغريب ان الشئ المشترك في الثلاث افلام هو نفس الشعور الذي تبقي لي بعد الفيلم (حاله من اليأس والاستسلام ) نهايات مؤسفه لا تحمل اي نوع من نبوه المبدعين في الحياه , افلام جيده اذا تم اعتبارها انها افلام تسجيليه تنقل واقع الاحياء الفقيره المؤسف بنظريه (هي كده وخلاص )
ولكن اتسائل هل المجتمع المصري كله اصبح بلطجي . ام ان المجتمع المصري لا يسعي الي مشاهده النماذج المكافحه المثاليه في مجتمعنا
. الجميع يعلم ان احيائنا الفقيره بها الكثير من النمازج المكافحه والتي تسعي لتحقيق حلم ايا
ما كان . ولكنها تسعي
اين السينما من هذه النمازج . واين دور السينما في المجتمع . السينما ليست مصلح اجتماعي ولكن السينما هي مؤشر اجتماعي . ودعونا نعترف ان المجتمع ليس لون واحد ولكنه الوان ونماذج عديده
فاين النماذج الاخري ؟ واين مصر من السينما ؟
واين دور المبدعين في هذا المجتمع ؟

للاسف ان الكثير من العاملين بالفن يعتمدوا علي اسلوب الحداثه الغير منطقي في توصيف الاشياء .
فاذا اعتبرنا ان الحياه منذ البدايه وحتي النهايه تحمل مفهوم الخير ومفهوم الشر , وان الخير سينتصر يوما . سيعتبره الكثير من اليائسين تفكير تقليدي وان الحداثه هي عرض العمل الفني بشكل غير تقليدي وهو بقاء الشر ويبقي الوضع كما هو عليه
واوضاعنا كعرب وكمصرين دليل علي بقاء الشر وتعايشنا معه
ولكن هل الحل هو تركيز الضؤ علي سلبيات جزء من المجتميع وعدم تدخل القائمين علي الاعمال بوجهه نظرهم وحلولهم
وفي نفس الوقت لا اطلب تخدير المجتمع باوهام وبان الدنيا بقي لونها بمبي

السينما من وجهه نظري البسيطه هي شاحن لبطاريات الشعوب (بالثوره – بالضحك – بالحزن- بالخوف
وباعتبار ان مجتمعنا المصري بيهنج . وده حقيقي. ففي اعتقادي ان شحنه باليأس في هذا الوقت سيجعله مغلق او خارج نطاق الخدمه

عمرو السعودي
19/07/2009

زرزور

انا مش هارد عليك يا صاحبى فير بكلمتين صغيرين ... وانا برده لا ناقد ولا متخصص ولكن متذوق ...

الفن عموما ( خد بالك من عموما ) يهدف الى خدمه الصالح العام ونقل واقائع الحياه ... يعنى لو فيه مشكله معينه فى المجتمع مهمته يطلعها ويفردها .....

لكن مش مطالب انه يقدم ليها حلول .... ولكن هو بيعرضها عشان فيه مسئولين المفروض انهم بيحاولو حل هذه المشاكل ...

وخد بالك من نقطه .. المفروض بدل ما تقول الافلام دى بائسه او يائسه او غيرة ... قول ان الافلام دى بتسوأ معه مصر لما الاجانب يشوفوها ...

وبرده هارد عليك واقولك ان ده فن ....

عماد عبد المقصود

مع احترامى لكلامك يامحمود زرزور لكن انا مختلف معاك ان انت تدافع عن الافلام دى
وانا متفق مع استاذ عمرو ان مصر كلها مفيهاش غير المناطق دى يعنى اللى يتكلموا عنها معاك ان دا موجود في الحقيقه واكتر من كده ومعاك ان الغرض منها انهم يبينوا المشاكل للمسؤلين عشان يحلوها ( دا الكلمتين اللى حافظنهم المخرجين والممثلين وبيقولهم في كل مكان مبررين سبب اختيارهم للقصص دى ) قال يعنى المسؤلين مش عارفين المشكال دى دول حافظينها اكتر منهم ويقدروا يعملوا ميت فيلم و اخرهم احمد السقا في البيت بيتك لما قال اننا بنتكلم عن جزء صغير في مصر مش معنى كده ان مصر كلها كده بس اللى بيشوف الافلام دى بيقول ان مصر كلها كده بالظبط لو قارنا ده بالافلام الهندى كان انطباعنا الاول عن الهند الحبل والانهار والفيل والحياه البدائية بالرغم من انها دوله متقدمه جدا واقتصادها قوى فالغرض من كلامى ان الافلام تعبر عن المجتمع واقتصاده واخلاقه وتقاليده يعنى من الاخر دا تشويه لصورة مصر سواء قدام الاجانب او قدام المصريين نفسهم يعنى لما طفل لسه باديء حياته يشوف افلام كده يبقي ماشي خايف لحسن يقابل الناس دى دا كمثال
من الاخر الافلام دى تجارة بمعنى ان المنتجين بيلاقوا ان الكوميدي شغال وبيجيب فلوس يبقي قشطه وادينى في الكوميدي شويه الكوميدي ريح شويتين واللى شغال الاكشن يبقي اديها اكشن الحق دا افلام اولاد الشوارع والعشوائيات بتعمل فلوس ملهاش حل يبقي مربي وفله وخليك في العشوائيات
اللى عايز اوصله ان اللى شغالين في المجال دة مش غرضهم اظهار قضيه او مشكله في المجتمع وحلها لكن غرضهم اظهار حاله موجوده في المجتمع وتكبيرها وتفخيمها وجعل ابطالها ناس سورى في اللفظ يعنى زباله ويبقوا هما الابطال بغرض جذب الناس للفيلم بالتشويق زى فيلم دكان شحاته ايه سبب وجود هيفا وهبي دعايه للفيلم وتجارة
اسف جدا جدا انى طولت بس الموضوع جميل والحوار احلى
شكرا للجميع